Партал пра сучаснае беларускае мастацтва і актывізм, а таксама сучасны тэатр.

Заснавальнік і шэф-рэдактар партала Art Aktivist - Сяргей Шабохін, галоўны рэдактар раздзела Мастацтва. Галоўная рэдактарка раздзела Тэатр – Святлана Уланоўская.

Партал публікаваў артыкулы пра апошнія навіны ў сучасным беларускім мастацтве і тэатры. На партале ў тым ліку можна было атрымаць інфармацыю энцыклапедычнага характару пра актуальныя беларускія мастачкі, інстытуцыі, праекты і іншыя падзеі (аснова для праекта INDEX).

На думку стваральнікаў партала камандзе ўдалося на працягу трохгадовага праекта вырашыць або ўказаць на цэлы шэраг пастаўленых задач/пытанняў:

Працэс палітызацыі мастацтва. Гэты працэс быў неабходны на фоне росту творчасці і актывізацыі грамадзянскай супольнасці ў Беларусі з канца 2010 года. Мастачкі і іншыя прадстаўнікі мастацкай супольнасці віталі прынцып неўмяшання ў палітычнае і крытычнае поле. Партал стаў галоўным рупарам які канструюе і прэзентуе працэсы палітызацыі беларускага мастацтва.

Выйсце з падполля. Для палітызацыі і актывізацыі крытычнага патэнцыялу мастацтва неабходна была змена парадыгмы ў беларускім сучасным мастацтве: ад так званага «ціхага партызанскага руху» да арт-актывізму. Парадыгма была зменена і паўплывала ў тым ліку на партызанскую стратэгію.

Аб'яднанне супольнасці. Як і любая разнастайная па структуры супольнасць, удзельнікі беларускага сучаснага мастацтва былі разрознены шматлікімі канфліктамі. У рамках дзейнасці рэсурсу ўдалося прыкметна кансалідаваць супольнасць, у тым ліку ўключыць беларускіх дзеячаў, якія імігравалі ў іншыя краіны (і якіх да дзейнасці партала большасць выключала з супольнасці, што сёння здаецца недарэчным).

Міждысцыплінарнасць. Партал ставіў сабе задачу ў тым ліку па кансалідацыі супольнасці беларускага сучаснага мастацтва з прадстаўнікамі іншых дысцыплін: філасофскай, тэатральнай, літаратурнай, навуковымі і іншымі. Найбольш прыкметную ролю на рэалізацыю гэтага працэсу апрача партала адказала дзейнасць галерэі сучаснага мастацтва “Ў”. Узаемадзеянне розных супольнасцяў моцна паўплывала на развіццё беларускага мастацтва.

Фемінісцкі дубец. Так званы «фемінісцкі дубец» (цытата Pussy Riot: «Фемінісцкі дубец карысны Расіі») карысны і Беларусі. Запрошаная рэдактарка Тамара Злобіна ў рамках сваёй дзейнасці актуалізавала і паставіла многія гендэрныя пытанні, запусціла шэраг важных дыскусій. У тым ліку востра абмяркоўваліся практычныя пытанні: уключэнне жанчын у мастацтва (літаральна, неабходнасць разумення захавання гендэрнага балансу ў працэсах) і ўкараненне фемінатываў.

Публічнасць. Мы разбіраліся ў тэорыі культуры бунту і прычынах яго адсутнасці ў Беларусі, абмяркоўвалі з запрошанай рэдактаркай Улай Торнау што такое публічнае (у тым ліку мастацтва ў публічнай прасторы), асвятлялі найбольш заўважныя практыкі беларускіх мастакоў у публічнай прасторы.

Салідарнасць. Разам з запрошанай рэдактаркай Юліяй Штраўс мы ўздымалі актуальныя сёння тэмы мігрантаў. Мы стараліся актуалізаваць прынцыпы салідарызацыі ў пытаннях падтрымкі адзін аднаго (выпадак з арыштам Віталя Калгіна) і актывіста з іншых краін (напрыклад: Pussy Riot).

Інфармаванне. Навіны, інфармацыя аб конкурсах і рэзідэнцыях, навінавыя агляды, вынікі года, афіша, падборка партфоліё художніц, пастаянныя публікацыі – уяўлялі сабой найбольш актуальную інфармацыю ў беларускім мастацтве.

Разнастайнасць. Усе гэтыя і іншыя актуалізаваныя парталам пытанні, задачы, працэсы, публікацыі і падзеі ў першую чаргу пашыралі разуменне беларускага мастацтва, дэманструючы неабходнасць уключэння разнастайных тэорый і практык.

Сярод іншых тэорый і тэрмінаў, якія абмяркоўваліся на партале, былі агучаны і зроблены спробы асэнсаваць наступныя: актывізм і арт актывізм, беларускі авангард, мастацтва ўзаемадзеяння, квір-тэорыя, крытычнае мастацтва, калекцыянаванне, культура бунту, культурнае спажывецтва, куратарства, мінская школа творчай фатаграфіі, маўклівыя акцыі пратэсту, музейная справа, перформанс, палітычная, палітычны мінімалізм, посткаланіяльная тэорыя, права на горад, прагрэсіўная настальгія, публічнае, радыкальнае мастацтва, змена парадыгмы: ад партызанства да актывізму, салідарызацыя, стварэнне новай акадэміі, стварэнне новага музея, стрыт-арт, урбаністыка, фемінісцкі дыскурс, фатаграфія, школа крытыкі і многія іншыя.

-

Выбраныя даты:

27 чэрвеня 2011

Партал заснаваны і афіцыйна прэзентаваны ў Мінску мастаком Сяргеем Шабохіным.

2014

Партал перастаў запаўняцца.

2015

Рэдактары рэсурса запусцілі новы праект: даследчую платформу беларускага сучаснага мастацтва KALEKTAR.

documents

names