Заснавальнік і лідэр гурта Ціхан Абрамаў у адным з інтэрв'ю так ахарактарызаваў яе ўдзельнікаў: «Цэлы букет самых розных аўтараў, аб'яднаных адной ідэяй – зладзіць маленькае свята, відовішча, каб не было сумна. Я - за буянства думак, сюжэтаў, формаў». Першая выстава авангардыстаў адбылася ў Бабруйску ў 1992 годзе. Яўген Алмаеў у «Хроніках «Зніклага свету» дзеліцца аб ёй сваімі ўражаннямі: «Наведвальнікаў экспазіцыі сустракаў выцягнуты па вертыкалі плакат з пералікам больш за трыццаць прозвішчаў удзельнікаў. Яшчэ вышэй знаходзіўся плакат паменш з двухсэнсоўным надпісам: “Не ўсе, хто знаходзяцца тут, належаць да іх. Не ўсе, хто належаць да іх, знаходзяцца тут». Глядач адсоўваў полаг і апыняўся ў нейкай бязмежна трансфармаванай прасторы. Стэрыльны паралелепіпед залы ператварыўся ў бязмежныя зараснікі дзікай сельвы. Ва ўсіх кірунках перасякаліся вяроўкі-ліяны з падвешанымі да іх рознымі бытавымі прадметамі, якія губляюць сваю ўтылітарнасць у кантэксце выставы. Поліэтыленавыя мяшочкі з пілавіннем падаваліся застылым вадаспадам. Страцілася ўсякае ўяўленне пра верх і ніз, адзінымі арыенцірамі служылі залацістыя вечкі для кансервацыі, прыбітыя да падлогі і вядучыя наведвальнікаў ад адной працы да іншай».