Выстава «Na pamiežžach» выходзіць з канцэпцыі памежных тэрыторый, напоўненых напружанасцю і ціскам, дзе фарміруецца беларуская ідэнтычнасць. Гэтае падвешанае «паміж» вучыць мастацтву выжывання і практыцы памежнай салідарнасці.
Мастацтва, прадстаўленае на выставе, сутыкаецца з разломамі ў геапалітычнай прасторы: гуманітарным крызісам на польска-беларускай мяжы, паўнамаштабнай інвазіяй ва Украіну, вымушанай міграцыяй, а таксама звяртаецца да старэйшых падзей, сляды якіх адчуваюцца і сёння.
«Na pamiežžach» стварае прастору для звяртання ўвагі на складаныя структуры сучаснасці — прастору, у якой мастацтва памежжа становіцца і сведчаннем, і інструментам крытычнага асэнсавання лёсу асоб і супольнасцяў на стыку культур, моваў і палітычных сістэм у Цэнтральна-Усходняй Еўропе.