Пасля пратэстаў 2020 года многія беларусы апынуліся ў эміграцыі. З 24 лютага 2022 года да патоку вымушаных эмігрантаў далучыліся ўкраінцы і расіяне, якія адмовіліся падтрымліваць пуцінскі рэжым. Апынуўшыся ў новых краінах, без дому і звыклых умоў жыцця, многія эмігранты вымушаны згаджацца на працу, далёкую ад іх прафесійнай дзейнасці і захапленняў. Такія работы часта прадугледжваюць поўныя працоўныя тыдні і часам 12-гадзінныя змены, пасля якіх не застаецца часу на асабістае жыццё, тым больш на творчасць.

Жыццё ператвараецца ў манатонную стужку, дзе дні не адрозніваюцца адзін ад аднаго. Але, пераязджаючы ў новую краіну, чалавек пераносіць з сабой і свой унутраны свет, які лёгка страціць у працэсе «інтэграцыі». Адсутнасць ведаў пра тое, дзе прымяніць свае навыкі, недахоп часу і даступных пляцовак для самавыражэння прыводзяць да страты асабістай ідэнтычнасці.

Менавіта для такіх людзей мы арганізавалі бясплатную выставу, прысвечаную фота- і відэатворчасці ў эміграцыі, — «Святло і страты на паперы». Гэтая выстава дае голас эмігрантам з Беларусі, Украіны і Расіі, якія, нягледзячы на складанасці новага жыцця, захавалі сваё бачанне навакольнага свету і здолелі перадаць яго праз аб'ектыў камеры.

"Святло і страты на паперы" — гэта гісторыя пра святло надзеі і страты, пра барацьбу з цяжкасцямі і сілу творчасці, якая натхняе тых, хто здолеў захаваць сябе і вырашыў рухацца далей.